हेटौँडा । बागमती प्रदेशका मुख्यमन्त्री तथा नेपाली कांग्रेस संसदीय दलका नेता बहादुर सिंह लामाले आजको मतविभाजनपछि संसदीय दलको नेताको हैसियत गुमाएका छन्।
मंगलबार हेटौँडामा बसेको नेपाली कांग्रेस बागमती प्रदेश संसदीय दलको बैठकमा विश्वासको मतमा मुख्यमन्त्री लामा पराजित भएका हुन्। बैठकमा भएको मत विभाजनमा लामाको विपक्षमा २२ मत खसेका छन् भने पक्षमा १५ मात्र परे। कुल ३७ सदस्य रहेको दलमा बहुमतको आधार १९ मत हो, तर लामा बहुमत जुटाउन असफल रहे।
यससँगै लामाले प्रदेश सरकारको नेतृत्वमा समेत अन्योल निम्तिएको छ। उनले नेतृत्व गरिरहेको सरकार अब अल्पमतमा परेको छ, जसले नयाँ सरकार गठनको प्रक्रिया अघि बढ्ने संकेत दिएको छ।
दलभित्र लामाको नेतृत्वमाथि लामो समयदेखि असन्तुष्टि रहेको चर्चा हुँदै आएको थियो। आजको मतविभाजनले त्यो असन्तुष्टि औपचारिक रूपमा सतहमा आएको पुष्टि गरेको छ।
