एजेन्सी । व्यवसायका लागि सबैभन्दा भरोसायोग्य वा सुरक्षित कुन देश छ होला ? व्यवसायमा रुची राख्ने वा ठूला व्यवसायीका लागि यो निकै चासोको विषय हो । स्वभाविक रुपमा विकसित र स्थिर राजनीति भएका देशहरु व्यवसायका लागि भरोसायोग्य नै मानिन्छन् ।
तर केही अन्तर्राष्ट्रिय संस्थाहरुले गरेको सर्भेले यसको विपरीत नतिजा देखाएका छन् । एडलम्यान ट्रस्ट ब्यारोमिटरले हालै सार्वजनिक गरेको २०२४ को रिपोर्ट अनुसार यस वर्ष कतिपय विकासशील देशहरुमा व्यवसायको भरोसा बढेको छ भने केही विकसित देशहरुमा विश्वास वा भरोसाको दर घटेको देखिएको छ । तीमध्ये कतिपय देशहरुको अवस्था भने अघिल्लो वर्षकै जस्तो वा स्थिर अवस्था छ ।
उदाहरणका लागि पछिल्लो वर्ष भारतमा व्यवसायमाथि भरोसाको दर बढेको छ भने बेलायतमा घटिरहेको छ । बेलायत त भरोसाको स्तरमा सबैभन्दा अन्त्यतिर देखिएको छ ।
विकासशील देशहरु अगाडि
व्यापारमा भरोसाको सन्दर्भमा विकासशील देशहरुले विकसित देशहरुलाई पछि पारेका छन् । विकासशील देशहरु ट्रस्ट इन्डेक्समा स्थिर रहेका छन् भने विकसित देशहरु घटेर इन्डेक्सको तल झरेका छन् । यसरी हेर्दा विकासशील देशहरु ट्रस्ट इन्डेक्सको ६३ औं नम्बरमा छन् भने विकशित देशहरु घटेर ४९ नम्बरमा झरेका छन् ।
चीन सबैभन्दा कम भरोसायोग्य
चीनले आफूलाई सबैभन्दा भरोसायोग्य देशको रुपमा स्थापित गरेको छ । तैपनि एक वर्षको अवधिमा इन्डेक्समा चीनको अंक ८३ बाट घटेर ७९ नम्बरमा झरेको छ । यसरी हेर्दा विदेशी कम्पनीहरुमा चीनमाथि कम भरोसा देखिन्छ । साथै बाँकी देशहरुमा चिनियाँ कम्पनीहरुमाथि पनि भरोसा घट्दो मात्रामा रहेको देखिन्छ ।
भारतको सुधार
ट्रस्ट इन्डेक्समा भारतको अंक एक वर्षमा ७३ बाट बढेर ७६ अंक पुगेको छ । यसले विश्वका सबैभन्दा भरोसायोग्य देशहरुमा भारतलाई पनि स्थापित गरेको छ । जहाँ भारतीयहरु आफ्नो देशको कम्पनीमाथि अत्यधिक विश्वास गर्ने पनि इन्डेक्सले देखाएको छ । जवकि विदेशी कम्पनीहरुमाथि भारतीयको विश्वास कम मात्रै रहेको इन्डेक्सले देखाएको छ ।
कुन देश व्यवसायका लागि भरोसायोग्य छ वा छैन भनेर एडलम्यान ट्रस्ट ब्यारोमिटरले २८ देशहरुमा गरेको सर्वेक्षणमा ३५ प्रतिशत उत्तरदाताहरुले भारतीय कम्पनीमाथि भरोसा गरेका थिए ।
बेलायत सबैभन्दा कम विश्वासिलो देशमा
समृद्ध देश बेलायत भने विश्वासको दृष्टिले तल झरेको देखिन्छ । यस वर्षको इन्डेक्समा बेलायत जम्मा ३९ नम्बरमा खुम्चिएको छ । सर्वेक्षण अनुसार जी ७ राष्ट्र बेलायत यसपटक अति कम भरोसायोग्य देशको रुपमा तल झरेको छ । यसमा बेलायत एक्लै छैन । यससँगै जापान, अर्जेन्टिना र दक्षिण कोरिया पनि सबैभन्दा कम भरोसायोग्य देशको स्तरमा छन् ।
सुधार गरेका देशहरु
दक्षिण कोरियाले अघिल्लो वर्षको तुलनामा आफ्नो ७ अंक बढाएको छ । यस्तै मलेसियाले पनि ६ अंक बढाएको छ । यसैगरी नाइजेरियाले आफ्नो ५ अंक बढाएको छ भने थाइल्यान्डले इन्डेक्समा आफ्नो ४ अंक बढाएको छ ।
यसरी हेर्दा इन्डेक्समा भरोसाका लागि आफ्नो अंक बढाउने वा सुधार गर्ने देशहरुमा यीनै देशहरु हुन् । यद्यपि यी देशहरु धेरै भरोसायोग्य देशको नम्बरमा उक्लिन सकिरहेका छैनन् ।
कुन कुन देशको भरोसा घट्यो ?
विश्वकै दोस्रो ठूलो अर्थतन्त्र भएको देश चीन भरोसायोग्य देशको रुपमा स्थापित भए पनि यस वर्ष इन्डेक्समा आफ्नो नम्बर घटाएको छ । अर्थात् चीनको भरोसा घट्दो क्रममा देखिएको छ ।
व्यापारका लागि चीनले आफ्नो विश्वास ४ अंकले घटाएको सर्वेक्षणले देखाएको छ । यसैगरी बेलायतको पनि ४ अंक नै घटेको छ । यसरी हेर्दा यी दुई विकसित देशहरुमा भरोसाको अंक सबैभन्दा धेरै गिरावट भएको छ ।
विकसित देशहरुको समस्या
विकसित देशहरु पनि भरोसाका लागि अपेक्षित रुपमा अगाडि भने छैनन् । विश्वकै सबैभन्दा ठूलो अर्थतन्त्र भएको अमेरिकाको ट्रस्ट इन्डेक्स अर्थात् भरोसा अंक स्थिर भए पनि ४६ अंक मात्रै छ ।
यस्तै जर्मनी, स्पेन जस्ता विकसित देशहरु पनि ४६ अंकमै सीमित छन् । यसरी हेर्दा विकसित देशहरु पनि भरोसा अंकमा औसतभन्दा तल देखिएका छन् । यस्तै अमेरिका जस्तो विकसित देशको अंक स्पेनकै जति समान रहेको सर्वेक्षणमा देखिन्छ।
केही देशमा अविश्वास हाबी
बेलायत, जापान र अर्जेन्टिना जस्ता देशहरुमा बढी मात्रामा अविश्वास रहेको सर्वेक्षणले देखाएको छ । जहाँ संस्थानहरुमा विश्वास बढाउन जरुरी रहेको एडलम्यान ट्रस्ट ब्यारोमिटर रिपोर्टले सुझाव दिएको छ । यसैगरी विश्वका सबैभन्दा शक्तिशाली देशका कम्पनीहरुमाथि भरोसा घट्नु धेरै चिन्ताको विषय रहेको पनि रिपोर्टको सुझाव छ ।
