नेपालकै सबैभन्दा ठूलो इन्टरनेट सेवा प्रदायक कम्पनी वर्ल्डलिंकले फिनल्याण्डको प्रतिष्ठित लगानी संस्था फिनफन्डबाट १ अर्ब ४२ करोड रुपैयाँ (१ करोड युरो) को लगानी भित्र्याएको छ। यो सम्झौता काठमाडौँस्थित मेरियट होटलमा सम्पन्न भएको हो। यस लगानीले वर्ल्डलिंकलाई आफ्नो पूर्वाधार विस्तार, सेवामा नवीनता, र गुणस्तरीयता सुधार गर्न ठूलो टेवा पुर्याउने अपेक्षा गरिएको छ।
वर्ल्डलिंकका प्रबन्ध निर्देशक दिलीप अग्रवालका अनुसार यो लगानी कम्पनीका लागि कोसेढुङ्गा सावित हुनेछ। वर्ल्डलिंकले हाल ९ लाखभन्दा बढी ग्राहकलाई सेवा प्रदान गरिरहेको छ। हाल वर्ल्डलिंकमा ५ हजार ५०० भन्दा बढी कर्मचारी छन्।
फिनफन्डको यो लगानीले वर्ल्डलिंकलाई नेपालमा इन्टरनेटको पहुँच विस्तार, उच्चगति सेवा प्रदान गर्ने र ग्रामीण क्षेत्रमा इन्टरनेट सुविधा पुर्याउन मद्दत गर्नेछ। अग्रवालले भने, “यो लगानीले नेपालमा डिजिटल क्रान्तिमा नयाँ ऊर्जा थप्नेछ।”
नेपालमा इलोन मस्कको स्टारलिङ्क सेवा विस्तारको तयारी गरिरहेको बेला, वर्ल्डलिंकको यो लगानीलाई प्रतिस्पर्धात्मक क्षमतामा सुधार गर्ने महत्त्वपूर्ण कदमका रूपमा हेरिएको छ। यो सम्झौताले विदेशी लगानीकर्तालाई पनि नेपाली इन्टरनेट र प्रविधि क्षेत्रमा आकर्षित गर्न सहयोग पुर्याउने विश्वास गरिएको छ।
