भारतको महाराष्ट्र राज्यमा भारतीय जनता पार्टी (भाजपा) सहितको गठबन्धनले शानदार जित हासिल गरेको छ ।
२८८ सदस्यीय विधान सभाको निर्वाचनमा भाजपासहितको गठबन्धनले २३५ सिटमा जित हासिल गरेको छ । भाजपासहितको हालको सत्तारुढ गठबन्धनको २०१९ मा १६१ सिट रहेको थियो ।
त्यस्तै महाराष्ट्रमा कांग्रेससहितको गठबन्धनले भने केवल ५० सिटमा मात्र जितेको छ भने अन्यले केवल ३ स्थानमा जित हासिल गरेका छन् । २०१९ मा कांग्रेससहितको विपक्षी दलहरुको ९८ सिट रहेको थियो । महाराष्ट्रमा बहुमतका लागि १४५ सिट आवश्यक रहेको छ ।
त्यस्तै अर्को राज्य झारखण्डमा भने झारखण्ड मुक्ति मोर्चा र कांग्रेससहितको गठबन्धनले जितेको छ । ८१ सिट रहेको झारखण्डमा झारखण्ड मुक्ति मोर्चासहितको गठबन्धनले ५६ सिटमा जित हासिल गरेको छ । यस राज्यमा बहुमतको लागि ४१ सिट आवश्यक पर्दछ । यस अघि २०१९ मा झारखण्ड मुक्ति मोर्चासहितको गठबन्धनको ४८ सिट रहेको थियो । त्यस्तै यस राज्यमा भाजपासहितको गठबन्धनले २४ सिटमा जित हासिल गरेको छ ।
