काठमाडौं । आगामी आर्थिक वर्ष २०८१/०८२ को बजेट भाषण हुने दिनसम्म चालू वर्षको कूल बजेटको करिब ६४ प्रतिशतमात्रै खर्च भएको छ । चालू आर्थिक वर्षका लागि सरकारले १७ खर्ब ५१ अर्ब रुपैयाँ बजेट छुट्याइको थियो । यो बजेटमध्ये, हालसम्म ११ खर्ब १५ अर्ब रुपैयाँ खर्च भएको छ । छुट्याइएको बजेटमध्ये, अब ६ खर्ब ३५ अर्ब रुपैयाँ खर्च हुन बाँकी छ ।
सरकारले नयाँ आर्थिक वर्षका लागि सरकारले आज बजेट ल्याउँदैछ । आगामी आर्थिक वर्षको बजेट सार्वजनिक गर्ने दिनसम्म, ६३.७२ प्रतिशत खर्च भएको महालेखा नियन्त्रक कार्यालयले जानकारी दिएको हो । सरकारले चालू वर्षमा १४ खर्ब २२ अर्ब राजस्व संकलन गर्ने लक्ष्य राखेकोमा, हिजोसम्ममा ८ खर्ब ६३ अर्ब रुपैयाँ संकलन भएको छ । हालसम्म ६० प्रतिशत मात्रै राजस्व संकलन भएको हो ।
सरकारले विकास खर्चका लागि ३ खर्ब बजेट छुट्याएकोमा ४१ प्रतिशत अर्थात् १ खर्ब २५ अर्ब रुपैयाँ खर्च भएको छ । तलब भत्ता र सरकारको दैनिक कामका लागि हालसम्म ७ खर्ब ८५ अर्ब चालु खर्च भएको पनि, महालेखाले जनाएको छ ।
